ದಾಂಡೇಲಿ: ಮದುವೆಗೆಂದು ಬೆಳಗಾವಿಗೆ ಹೋಗಿ ಹಿಂದುರುಗಿ ಬರುತ್ತಿದ್ದಾಗ ಹೆಜ್ಜೇನು ದಾಳಿ ಮಾಡಿ ಮೂವರಿಗೆ ಗಾಯವಾದ ಘಟನೆ ಸಿಂಗರಗಾವ್‌ನಲ್ಲಿ ನಡೆದಿದೆ.
ತಾಲೂಕಿನ ಕೋಗಿಲಬನ ಗ್ರಾಮದ ನಿವಾಸಿಗಳಾದ ರವಿ ಕಾಳೆ ಮತ್ತು ಅವರ ಪತ್ನಿ ರೇಖಾ ಹಾಗೂ ಅವರ ಅಣ್ಣನ ಮಗ ಆದಿತ್ಯ ಹೆಜ್ಜೇನು ದಾಳಿಯಿಂದ ಗಾಯಗೊಂಡವರಾಗಿದ್ದು, ದಾಂಡೇಲಿ ಸಾರ್ವಜನಿಕ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಬೆಳಗಾವಿಯಿಂದ ಎರಡು ದ್ವಿಚಕ್ರ ವಾಹನದಲ್ಲಿ ಬರುತ್ತಿದ್ದಾಗ ಸಿಂಗರಗಾವ್ ನಲ್ಲಿ ಏಕಾಏಕಿ ಹೆಜ್ಜೇನು ದಾಳಿ ಮಾಡಿದೆ. ಹಿಂಡುಗಟ್ಟಲೆ ಹೆಜ್ಜೇನು ದಾಳಿ ಮಾಡುತ್ತಿರುವ ನಡುವೆಯು ಹರಸಾಹಸ ಪಟ್ಟು ಮುಂದೆ ಬಂದಿದ್ದಾರೆ. ಹೆಜ್ಜೇನು ದಾಳಿಯಿಂದ ಈ ಮೂವರಿಗೂ ಗಾಯವಾಗಿದೆ. ಸಾರ್ವಜನಿಕ ಆಸ್ಪತ್ರೆಗೆ ದಾಂಡೇಲಿ ಗ್ರಾಮೀಣ ಪೊಲೀಸರು ಭೇಟಿ ನೀಡಿದ್ದಾರೆ.
