ಸಿದ್ದಾಪುರ: ಯಕ್ಷಗಾನ‌ದ ಭಾಗವತರಾಗಿ ಕಳೆದ ನಾಲ್ಕು ದಶಕಗಳಿಗಿಂತಲೂ ಅಧಿಕ ಕಾಲದಿಂದ ಸೇವೆ ಸಲ್ಲಿಸುತ್ತಿರುವ ತಾಲೂಕಿನ ದಂಟ್ಕಲ್‌ನ ಸತೀಶ ಹೆಗಡೆ ಅವರಿಗೆ ಪ್ರತಿಷ್ಠಿತ ಅನಂತಶ್ರೀ ಪ್ರಶಸ್ತಿ ಪ್ರಕಟವಾಗಿದೆ.
ಇಲ್ಲಿನ ಅನಂತ ಯಕ್ಷಕಲಾ ಪ್ರತಿಷ್ಠಾನ ನೀಡುವ ಈ ಪ್ರಶಸ್ತಿಯನ್ನು ಪ್ರಕಟಿಸಿದ ಸಂಸ್ಥೆ ಅಧ್ಯಕ್ಷ ವಿ.ಎಂ.ಭಟ್ಟ, ಯಕ್ಷಗಾನ ಕುಟುಂಬದಿಂದ ಬಂದು ಕಲಾ ಕ್ಷೇತ್ರದ ಪಯಣದಲ್ಲಿ ನಾರ್ಣಪ್ಪವ ಉಪ್ಪೂರು, ಹೊಸ್ತೋಟ ಮಂಜುನಾಥ ಭಾಗವತರ ಗರಡಿಯಲ್ಲಿ ಪಳಗಿದವರು. ಪಂಡಿತ್ ಎಂ.ಪಿ.ಹೆಗಡೆ ಅವರಲ್ಲಿ ಹಿಂದುಸ್ತಾನಿ ರಾಗಗಳನ್ನೂ ಅಧ್ಯಯನ ಮಾಡಿದವರು. ಪೌರಾಣಿಕ ಆಖ್ಯಾನಗಳನ್ನು ನವಿರಾಗಿ ಪ್ರಸ್ತುತಗೊಳಿಸುವ ಸತೀಶ ಅವರು ಕೊಳಗಿ ಅನಂತ ಹೆಗಡೆ ಅವರ ನಿಕಟ ಒಡನಾಡಿಗಳೂ ಆಗಿದ್ದಾರೆ ಎಂದರು.
ಸತೀಶ ದಂಟ್ಕಲ್ ಅವರಿಗೆ ನವೆಂಬರ್ ಮೂರನೇ ವಾರ ನಡೆಸಲಾಗುವ ಅನಂತೋತ್ಸವದಲ್ಲಿ ಪ್ರಶಸ್ತಿ ಪ್ರದಾನ ಮಾಡಲಾಗುತ್ತದೆ ಎಂದು ಪ್ರತಿಷ್ಠಾನದ ಕಾರ್ಯದರ್ಶಿ, ಭಾಗವತ ಕೊಳಗಿ ಕೇಶವ ಹೆಗಡೆ ಪ್ರಕಟನೆಯಲ್ಲಿ ತಿಳಿಸಿದ್ದಾರೆ.
