ಭಟ್ಕಳ: ಕಸಾಯಿಖಾನೆಗೆ ಸಾಗಿಸಲು ಯತ್ನಿಸಿ ಅಜ್ಞಾತ ಸ್ಥಳದಲ್ಲಿ ಕೂಡಿಹಾಕಿದ್ದ ಆಕಳು ಕರುವೊಂದನ್ನು ಹಿಂದೂ ಕಾರ್ಯಕರ್ತರು ಬಿಡಿಸಿ ಕರುವನ್ನು ಗೋಶಾಲೆಗೆ ಸಾಗಿಸಿ ರಕ್ಷಿಸಿದ ಘಟನೆ ಇಲ್ಲಿನ ನಗರದ ಸಂತೆ ಮಾರುಕಟ್ಟೆಯಲ್ಲಿ ನಡೆದಿದೆ.
ಇಲ್ಲಿನ ಸಂತೆ ಮಾರುಕಟ್ಟೆಯ ಸಮೀಪದಲ್ಲಿ ಕರುವೊಂದು ಕೂಗಿದ ಶಬ್ದ ಕೇಳುತ್ತಿರುವುದನ್ನು ಗಮನಿಸಿದ ಪ್ರಾಣಿ ದಯಾ ಸಂಘದ ಸದಸ್ಯ ನಾಗಪ್ರಸಾದ್ ಸಮೀಪ ಹೋಗಿ ನೋಡಿದ್ದಾಗ ಆಕಳು ಕರುವನ್ನು ಕುತ್ತಿಗೆಗೆ ಕಟ್ಟಿ ಕೂಡಿ ಹಾಕಿರುವುದನ್ನು ಗಮನಿಸಿ ತಕ್ಷಣ ಹಿಂದೂ ಕಾರ್ಯಕರ್ತರಿಗೆ ಕರೆ ಮಾಡಿದರು. ಸ್ಥಳಕ್ಕೆ ಆಗಮಿಸಿ ಆಸರಕೇರಿಯ ರಾಜೇಶ ನಾಯ್ಕ ಹಾಗೂ ಇತರ ಹಿಂದೂ ಕಾರ್ಯಕರ್ತರು ಭಟ್ಕಳ ನಗರ ಠಾಣೆ ಪೊಲೀಸರಿಗೆ ವಿಷಯ ತಿಳಿಸಿದರು. ಸ್ಥಳಕ್ಕೆ ಪೊಲೀಸ್ ಠಾಣೆ ಸಿಬ್ಬಂದಿ ಸ್ಥಳಕ್ಕೆ ಆಗಮಿಸಿ ಕರುವನ್ನು ಮುರುಡೇಶ್ವರದ ಧೇನು ಗೋಶಾಲೆಗೆ ಸಾಗಿಸಿದರು.
ಸಾರ್ವಜನಿಕರಿಂದ ಆಗ್ರಹ: ನಗರದದಲ್ಲಿ ಪ್ರತಿದಿನ ಗೋವುಗಳು ನಾಪತ್ತೆಯಾಗುತ್ತಿದ್ದು ಭಟ್ಕಳದ ಸಂತೆ ಮಾರುಕಟ್ಟೆ ಹಾಗೂ ಹಳೇ ಬಸ್ ನಿಲ್ದಾಣದಲ್ಲಿ ಮಧ್ಯರಾತ್ರಿ ಹಲವು ದಿನಗಳಿಂದ ಗೋವುಗಳನ್ನು ವಾಹನಗಳಲ್ಲಿ ತುಂಬಿ ಕಸಾಯಿಖಾನೆಗೆ ಸಾಗಿಸುವ ತಂಡವು ಸಕ್ರಿಯವಾಗಿದೆ. ಪೊಲೀಸರು ರಾತ್ರಿ ಸಮಯದಲ್ಲಿ ನಗರ ಪ್ರದೇಶದಲ್ಲಿ ಸಂಚರಿಸುವ ವಾಹನದ ಮೆಲೆ ನೀಗಾ ಇಟ್ಟು ಅಂತಹ ವಾಹನದ ನಂಬರನ್ನು ನೊಂದಾಯಿಸಿಕೊಂಡು ಗೋವು ಕಳ್ಳರನ್ನು ಹಿಡಿದು ಶಿಕ್ಷಿಸಬೇಕಾಗಿದೆ.
