ದಾಂಡೇಲಿ : ತಾಲೂಕಿನ ತಹಶೀಲ್ದಾರರ ವಾಹನವು ಹಳೆಯ ವಾಹನವಾಗಿದ್ದು, ತುರ್ತು ಸಂದರ್ಭದಲ್ಲಿ ನಿಗದಿತ ಸಮಯಕ್ಕೆ ಸರಿಯಾಗಿ ಸಂಬಂಧಿಸಿದ ಸ್ಥಳಕ್ಕೆ ಹೋಗಲು ಈ ವಾಹನದ ದುಸ್ಥಿತಿಯಿಂದ ಕಷ್ಟ ಸಾಧ್ಯವಾಗುತ್ತಿದೆ. ಸರಿಸುಮಾರು 15 ವರ್ಷಗಳನ್ನು ಪೂರೈಸಿರುವ ತಹಶೀಲ್ದಾರರ ವಾಹನವು ತೀರಾ ಹಳೆಯದಾಗಿದ್ದು, ಸರಿಯಾಗಿ ಕೆಲಸ ನಿರ್ವಹಿಸುತ್ತಿಲ್ಲ.
ವಾರಕ್ಕೊಮ್ಮೆ ಗ್ಯಾರೇಜ್ ಸೇರುತ್ತಿರುವ ಈ ವಾಹನವನ್ನು ಬದಲಾಯಿಸಿ ತಹಶೀಲ್ದಾರರಿಗೆ ಹೊಸ ವಾಹನವನ್ನು ಕೊಡುವ ನಿಟ್ಟಿನಲ್ಲಿ ಜಿಲ್ಲಾಧಿಕಾರಿಗಳು ಅಗತ್ಯ ಕ್ರಮವನ್ನು ಕೈಗೊಳ್ಳಬೇಕೆಂದು ನಗರಸಭೆಯ ಸದಸ್ಯರಾದ ಮೋಹನ ಹಲುವಾಯಿ ಮತ್ತು ಸಂಜಯ ನಂದ್ಯಾಳ್ಕರ ಅವರು ಶನಿವಾರ ನಗರದಲ್ಲಿ ಮಾಧ್ಯಮದ ಮೂಲಕ ಜಿಲ್ಲಾಧಿಕಾರಿಗಳಿಗೆ ಮನವಿಯನ್ನು ಮಾಡಿದ್ದಾರೆ.
