ಸಿದ್ದಾಪುರ : ತಾಲೂಕಿನ ಕ್ಯಾದಗಿ ಸೇವಾ ಸಹಕಾರಿ ಸಂಘದ ಆವರಣದಲ್ಲಿ ರವಿವಾರ ಕ್ಯಾದಗಿ ವ್ಯವಸಾಯ ಸೇವಾ ಸಹಕಾರಿ ಸಂಘದಲ್ಲಿ ನಿರ್ದೇಶಕರಾಗಿ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿ ನಿಧನರಾದ ಎನ್.ಐ.ನಾಯ್ಕ್ ಐನಕೈರವರ ಪುತ್ಥಳಿ ಅನಾವರಣ ಕಾರ್ಯಕ್ರಮ ನಡೆಯಿತು.
ಹೆಮ್ಮನಬೈಲ್ ಸೇವಾ ಸಹಕಾರಿ ಸಂಘದ ಅಧ್ಯಕ್ಷ ಬಿ.ಆರ್. ನಾಯ್ಕ್ ಪುತ್ಥಳಿ ಅನಾವರಣಗೊಳಿಸಿ ಸಹಕಾರಿ ಕ್ಷೇತ್ರಕ್ಕೆ ಎನ್.ಐ.ನಾಯ್ಕ್ ನೀಡಿದ ಕೊಡುಗೆ ಕುರಿತು ತಿಳಿಸಿದರು ಮತ್ತು ಅವರೊಂದಿಗಿನ ತಮ್ಮ ಒಡನಾಟ ಹಂಚಿಕೊಂಡರು. ಸಭಾ ಕಾರ್ಯಕ್ರಮವನ್ನು ಸಾಮಾಜಿಕ ಕಾರ್ಯಕರ್ತ ವಸಂತ ನಾಯ್ಕ್ ಮನ್ಮನೆ ಉದ್ಘಾಟಿಸಿ ಆರ್ಥಿಕವಾಗಿ ಬದುಕು ಕಟ್ಟಿಕೊಳ್ಳಲು ನೂರಾರು ಜನರಿಗೆ ಎನ್.ಐ. ನಾಯ್ಕ್ ಸಹಾಯ ಸಹಕಾರ ನೀಡಿದ್ದಾರೆ ಅಲ್ಲದೆ ಸಂಘದ ಅಭಿವೃದ್ಧಿಗೆ ಹಗಲು ರಾತ್ರಿ ಇಲ್ಲದೆ ಪ್ರಾಮಾಣಿಕವಾಗಿ ದುಡಿದು ಜನಮನ ಗೆದ್ದಿದ್ದಾರೆ, ಇಂತಹ ವ್ಯಕ್ತಿಗಳ ಪುತ್ಥಳಿ ಅನಾವರಣಗೊಳಿಸುತ್ತಿರುವುದು ಶ್ಲಾಘನೀಯ. ಸಮಾಜಕ್ಕೆ ಕೊಡುಗೆ ನೀಡಿದವರ ಆದರ್ಶಗಳು ಮುಂದಿನ ತಲೆಮಾರಿನವರಿಗೆ ಮಾದರಿಯಾಗಬೇಕು. ಇವರ ಕುಟುಂಬದವರಿಗೆ ಸಂಘ ಆರ್ಥಿಕ ಸಹಕಾರ ನೀಡಬೇಕು ಎಂದರು.
ಕ್ಯಾದಗಿ ವ್ಯವಸಾಯ ಸೇವಾ ಸಹಕಾರಿ ಸಂಘದ ಅಧ್ಯಕ್ಷ ಎಂ.ಜಿ. ನಾಯ್ಕ ಹಾದ್ರಿಮನೆ ಮಾತನಾಡಿ ಎನ್.ಐ.ನಾಯ್ಕ್ ಸಹಕಾರಿ ಕ್ಷೇತ್ರದ ಶಕ್ತಿಯಾಗಿದ್ದರು ಎಲ್ಲರೊಂದಿಗೂ ಬೆರೆತು ಮಾತನಾಡುತ್ತಿದ್ದರು ಸಹಕಾರಿ ಕ್ಷೇತ್ರದಲ್ಲಿ ಸಹಕಾರ ಮಾಡುವ ಮನೋಭಾವನೆ ಇದ್ದರೆ ಮಾತ್ರ ಆ ಸಂಘ ಅಭಿವೃದ್ಧಿ ಆಗಲು ಸಾಧ್ಯ ಮತ್ತು ಅಂತಹ ವ್ಯಕ್ತಿಗಳು ಮಾತ್ರ ನೆನಪಿನಲ್ಲಿ ಉಳಿಯುತ್ತಾರೆ ಅವರ ಸಾಲಿಗೆ ಎನ್.ಐ. ನಾಯ್ಕ್ ಸೇರುತ್ತಾರೆ ಎಂದರು.
ಪ್ರಮುಖ ಮುಖಂಡರುಗಳಾದ ವಿ.ಎನ್. ನಾಯ್ಕ್ ಬೇಡ್ಕಣಿ, ವಿವೇಕ ಭಟ್, ಜೆ.ಎಲ್. ಗೌಡ, ನಾಗರಾಜ ನಾಯ್ಕ ಬೇಡ್ಕಣಿ, ಗಣೇಶ್ ಎನ್. ಭಟ್, ದಿವಾಕರ ನಾಯ್ಕ್ ಹೆಮ್ಮನ ಬೈಲ್ ಮಾತನಾಡಿ ಸಹಕಾರಿ ಕ್ಷೇತ್ರಕ್ಕೆ ಎನ್.ಐ.ನಾಯ್ಕ್ ರವರ ಕೊಡುಗೆ ಅಪಾರ ಸಮಾಜದ ಅಭಿವೃದ್ಧಿಗಾಗಿ ಸಿಕ್ಕ ಸರ್ಕಾರಿ ಕೆಲಸವನ್ನು ಬಿಟ್ಟು ಪ್ರಾಮಾಣಿಕವಾಗಿ ದುಡಿದಿದ್ದಾರೆ ಅವರ ನೆನಪಿಗೆ ಇಂದು ಅವರ ಪುತ್ಥಳಿ ಅನಾವರಣಗೊಳಿಸುತ್ತಿರುವುದು ನಿಜಕ್ಕೂ ಮಾದರಿ ಕಾರ್ಯ, ಪಕ್ಷಭೇದವಿಲ್ಲದೆ, ಜಾತಿಭೇದವಿಲ್ಲದೆ ಬಡವರಿಗೆ ಸಹಕಾರವನ್ನು ನೀಡಿರುವುದನ್ನ ನಾವು ಸ್ಮರಿಸಿಕೊಳ್ಳಬೇಕು, ಸಮಾಜಕ್ಕೆ ನಿಸ್ವಾರ್ಥ ಸೇವೆ ಸಲ್ಲಿಸಿದ ಅವರ ಕುಟುಂಬ ಆರ್ಥಿಕ ಸಂಕಷ್ಟದಲ್ಲಿದೆ ಆರ್ಥಿಕ ಸಹಾಯ ಮಾಡುವ ಮೂಲಕ ಮುಂದಿನ ದಿನದಲ್ಲಿ ನಿಸ್ವಾರ್ಥ ಸಮಾಜ ಸೇವೆಗೆ ಬರುವವರಿಗೆ ಸಮಾಜ ಸೇವೆ ಮಾಡಿದರೆ ಸಮಾಜ ನಮ್ಮ ಜೊತೆ ನಿಲ್ಲುತ್ತದೆ ಎನ್ನುವ ಸಂದೇಶ ಹೋಗಬೇಕು. ತಾವು ಯಾವುದೇ ಅಭಿವೃದ್ಧಿ ಬಯಸದೆ ಎಲ್ಲವನ್ನು ಸಮಾಜಕ್ಕೆ ನೀಡಿದ್ದಾರೆ. ಇಂತಹ ವ್ಯಕ್ತಿಗಳ ಆದರ್ಶವನ್ನು ನಾವೆಲ್ಲರೂ ಪಾಲಿಸಬೇಕು ಇಂದು ಅನಾವರಣಗೊಂಡ ಪುತ್ಥಳಿಯನ್ನು ಮುಂದಿನ ದಿನದಲ್ಲಿ ನಿರ್ವಹಣೆ ಮಾಡುವ ಜವಾಬ್ದಾರಿ ಕೂಡ ವಹಿಸಿಕೊಳ್ಳಬೇಕಾಗುತ್ತದೆ. ಪುತ್ಥಳಿಗೆ ಧಕ್ಕೆಯಾಗದಂತೆ ಸ್ವಚ್ಛತೆ ಕಾಪಾಡಿಕೊಂಡು ಪ್ರತಿ ವರ್ಷ ಜನವರಿ 26ರಂದು ವಿಶೇಷ ಕಾರ್ಯಕ್ರಮವನ್ನು ಆಯೋಜಿಸುವ ಮೂಲಕ ಅವರ ನೆನಪು ಶಾಶ್ವತವಾಗಿರಿಸ ಬೇಕು ಎಂದರು .
ಪುತ್ಥಳಿ ಅನಾವರಣ ಸಮಿತಿಯ ಪದಾಧಿಕಾರಿಗಳಾದ ಪ್ರಕಾಶ್ ಜಿ. ನಾಯ್ಕ್, ಕೆ. ಟಿ. ನಾಯ್ಕ್ ಹೆಗ್ಗೇರಿ, ಆರ್.ಜಿ. ಹೆಗಡೆ ಬಿಳಲಿಗೆ ಮತ್ತು ಎನ್. ಐ. ನಾಯ್ಕ್ ಸಂಬಂಧಿ ರಮೇಶ್ ನಾಯ್ಕ್,ಕ್ಯಾದಗಿ ಗ್ರಾಮ ಪಂಚಾಯತ್ ಅಧ್ಯಕ್ಷ ರಾಮಕೃಷ್ಣ ನಾಯ್ಕ್ ಉಪಸ್ಥಿತರಿದ್ದರು.
ಪುತ್ಥಳಿ ಅನಾವರಣ ಸಮಿತಿ ಅಧ್ಯಕ್ಷ ಎಸ್.ಆರ್. ನಾಯ್ಕ್ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಪ್ರಾಸ್ತಾವಿಕ ಮಾತನಾಡಿ ಎನ್.ಐ.ನಾಯ್ಕ್ ರವರ ಪುತ್ಥಳಿ ಅನಾವರಣ ಯಾಕೆ ಮಾಡಲಾಗಿದೆ ಅವರ ಕೊಡುಗೆ ಏನು, ಅವರ ಜೀವನ ಹಾಗೂ ತ್ಯಾಗ ಕುರಿತು ಮಾತನಾಡಿದರು.
ಪುತ್ಥಳಿ ಅನಾವರಣ ಸಮಿತಿಯ ಉಪಾಧ್ಯಕ್ಷ ಸುಭಾಷ್ ಚಂದ್ರ ನಾಯ್ಕ್ ಸ್ವಾಗತಿಸಿದರು. ಸುರೇಶ್ ನಾಯ್ಕ್ ನಿರೂಪಿಸಿ ವಂದಿಸಿದರು. ಇದೆ ಸಂದರ್ಭದಲ್ಲಿ ಎನ್.ಐ. ನಾಯ್ಕ್ ರವರ ಪತ್ನಿ ಕನ್ನಮ್ಮ ಅವರನ್ನ ಗೌರವಿಸಲಾಯಿತು.
