ಅಯೋಧ್ಯಾ: ಅಯೋಧ್ಯೆ ರಾಮಮಂದಿರ ಪುನರ್‌ನಿರ್ಮಾಣ ಮತ್ತು ಉದ್ಘಾಟನೆ ದೇಶದಲ್ಲಿ ರಾಷ್ಟ್ರೀಯ ಹೆಮ್ಮೆಯ ಪುನರುತ್ಥಾನವನ್ನು ಸೂಚಿಸುತ್ತದೆ ಎಂದು ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಮುಖ್ಯಸ್ಥ ಮೋಹನ್ ಭಾಗವತ್ ಸಂತಸ ವ್ಯಕ್ತಪಡಿಸಿದ್ದಾರೆ.
ಅಂದು ವಿದೇಶಿಗರು ದೇಶವನ್ನು ಆಕ್ರಮಿಸಿ ದೇವಾಲಯಗಳನ್ನು ನಾಶಪಡಿಸಿದರು. ಭಾರತೀಯ ಸಮಾಜವನ್ನು ದುರ್ಬಲಗೊಳಿಸಲು, ಭಾರತವನ್ನು ಆಳಲು ಇದನ್ನು ಮಾಡಿದರು. ಬಳಿಕ ಅಯೋಧ್ಯೆಯ ರಾಮ ಮಂದಿರವನ್ನು ಕೂಡ ಧ್ವಂಸಗೊಳಿಸಲಾಗಿದೆ.ಆದರೂ ಅವರು ಭಾರತದಲ್ಲಿ ಯಶಸ್ವಿಯಾಗಲಿಲ್ಲ. ಏಕೆಂದರೆ, ಇಲ್ಲಿನ ಸಮಾಜದ ನಂಬಿಕೆ, ಬದ್ಧತೆ ಮತ್ತು ನೈತಿಕತೆ ಕಡಿಮೆಯಾಗಲಿಲ್ಲ. ಹೋರಾಟ ಮುಂದುವರೆಯಿತು ಮತ್ತು ಸಮಾಜವು ಆಕ್ರಮಣಕಾರರಿಗೆ ತಲೆಬಾಗಲಿಲ್ಲ.
ಶ್ರೀರಾಮನ ಜನ್ಮಸ್ಥಳವನ್ನು ಮರಳಿ ವಶಪಡಿಸಿಕೊಳ್ಳಲು ಮತ್ತು ಅಲ್ಲಿ ದೇವಾಲಯವನ್ನು ನಿರ್ಮಿಸಲು ಹಲವಾರು ಹೋರಾಟಗಳು ನಡೆದಿವೆ. ಹಲವಾರು ಯುದ್ಧಗಳು ಮತ್ತು ತ್ಯಾಗಗಳ ನಂತರ ರಾಮ ಜನ್ಮಭೂಮಿಯ ವಿಷಯವು ಜನರ ಮನಸ್ಸಿನಲ್ಲಿ ಬೇರೂರಿದೆ. 1857 ರ ದಂಗೆಯ ಸಮಯದಲ್ಲಿ ಹಿಂದುಗಳು ಮತ್ತು ಮುಸ್ಲಿಮರು ಬ್ರಿಟಿಷರ ವಿರುದ್ಧ ಒಟ್ಟಾಗಿ ಹೋರಾಡಿದರು. ಗೋಹತ್ಯೆ ನಿಷೇಧ ಮತ್ತು ರಾಮ ಜನ್ಮಭೂಮಿ ವಿಚಾರಕ್ಕೆ ಸಂಬಂಧಿಸಿದಂತೆ 2 ಸಮುದಾಯಗಳ ನಡುವೆ ಪರಸ್ಪರ ಒಪ್ಪಂದವೂ ಇತ್ತು. ಆದರೆ, ದುರದೃಷ್ಟವಶಾತ್ ದಂಗೆಯು ವಿಫಲವಾಯಿತು. ಆದರೂ ರಾಮ ಜನ್ಮಭೂಮಿಗಾಗಿ ಹೋರಾಟ ಮುಂದುವರೆಯಿತು. ಎರಡು ಸಮುದಾಯಗಳ ನಡುವಿನ ಒಗ್ಗಟ್ಟು ಮುರಿಯಲು ಬ್ರಿಟಿಷರು ರಾಮ ಜನ್ಮಭೂಮಿ ಚಳವಳಿಯ ವೀರರನ್ನು ಗಲ್ಲಿಗೇರಿಸಿದರು. ಸಮಸ್ಯೆ ಬಗೆಹರಿಯಲಿಲ್ಲ ಎಂದು ಹೇಳಿದ್ದಾರೆ.
ಭಾರತವು ಬ್ರಿಟಿಷರ ಆಳ್ವಿಕೆಯಿಂದ ಸ್ವಾತಂತ್ರ್ಯ ಪಡೆದ ನಂತರ ಸೋಮನಾಥ ದೇವಾಲಯವನ್ನು ಸರ್ವಾನುಮತದಿಂದ ನವೀಕರಿಸಲಾಯಿತು. ಆದರೆ ರಾಮಮಂದಿರ ಪುನ‌ರ್ ನಿರ್ಮಾಣದ ಚರ್ಚೆ ಆರಂಭವಾಗುವ ಮುನ್ನವೇ ಅವರ ಪ್ರಕಾರ ದೇಶದ ರಾಜಕೀಯ ಬದಲಾಯಿತು. ಅವರ ಪ್ರಕಾರ, ತಾರತಮ್ಯ ಮತ್ತು ತುಷ್ಟಿಕರಣದಂತಹ ಸ್ವಾರ್ಥ ರಾಜಕಾರಣದ ಸ್ವರೂಪಗಳು ಪ್ರಚಲಿತವಾದವು ಮತ್ತು ಆದ್ದರಿಂದ ಪ್ರಶ್ನೆಯು ಹಾಗೆಯೇ ಉಳಿದಿದೆ. ಅಂದಿನ ಸರ್ಕಾರ ಹಿಂದುಗಳ ಭಾವನೆಗಳನ್ನು ಪರಿಗಣಿಸಲಿಲ್ಲ. ವಾಸ್ತವವಾಗಿ ಅವರು ಸಮಾಜ ಕೈಗೊಂಡ ಉಪಕ್ರಮವನ್ನು ನಾಶಮಾಡಲು ಪ್ರಯತ್ನಿಸಿದರು ಎಂದರು.
ರಾಮ ಜನ್ಮಭೂಮಿಯ ವಿಮೋಚನೆಗಾಗಿ 1980 ರ ದಶಕದಲ್ಲಿ ಪ್ರಾರಂಭವಾದ ಚಳವಳಿ ವಿವರಿಸಿದ ಅವರು, 1949ರಲ್ಲಿ ರಾಮ ಜನ್ಮಭೂಮಿ ಸ್ಥಳದಲ್ಲಿ ರಾಮನ ವಿಗ್ರಹ ಕಾಣಿಸಿಕೊಂಡಿತ್ತು. ಮುಂದೆ 1986ರಲ್ಲಿ ನ್ಯಾಯಾಲಯದ ಆದೇಶದ ಮೇರೆಗೆ ದೇವಾಲಯದ ಬೀಗವನ್ನು ತೆರೆಯಲಾಯಿತು. ಕರಸೇವಕರ ಹೋರಾಟ ವರ್ಷಗಳ ಕಾಲ ಮುಂದುವರೆಯಿತು ಎಂದರು. ಅಂತಿಮವಾಗಿ ನವೆಂಬರ್ 2019 ರಲ್ಲಿ, 134 ವರ್ಷಗಳ ಕಾನೂನು ಹೋರಾಟದ ನಂತರ, ಸುಪ್ರೀಂ ಕೋರ್ಟ್ ಸತ್ಯಗಳನ್ನು ಪರಿಶೀಲಿಸಿದ ನಂತರ ಸಮತೋಲಿತ ನಿರ್ಧಾರವನ್ನು ನೀಡಿತು. ಉಭಯ ಪಕ್ಷಗಳ ಭಾವನೆಗಳು ಮತ್ತು ಸತ್ಯಗಳನ್ನು ಗೌರವಿಸುವುದಕ್ಕಾಗಿ ಅವರು ಸುಪ್ರೀಂ ಕೋರ್ಟ್ ಅನ್ನು ಶ್ಲಾಘಿಸಿದರು.
ಜ.22ರಂದು ಅಯೋಧ್ಯೆಯಲ್ಲಿ ಮಂದಿರ ಉದ್ಘಾಟನೆಯಾಗುವುದರೊಂದಿಗೆ ವಿವಾದದ ಪರ ಮತ್ತು ವಿರೋಧವಾಗಿ ಉದ್ಭವಿಸಿರುವ ಸಂಘರ್ಷಕ್ಕೆ ಅಂತ್ಯ ಹಾಡಬೇಕಿದೆ. ಈ ನಡುವೆ ಎದ್ದಿರುವ ಕಹಿಯೂ ಕೊನೆಯಾಗಬೇಕು. ಸಮಾಜದ ಪ್ರಜ್ಞಾವಂತ ಜನರು ವಿವಾದವು ಸಂಪೂರ್ಣವಾಗಿ ಕೊನೆಗೊಳ್ಳುವುದನ್ನು ನೋಡಬೇಕು. ಅಯೋಧ್ಯೆ ಎಂದರೆ ‘ಯುದ್ದ ಇಲ್ಲದ ನಗರ’, ‘ಸಂಘರ್ಷ ಮುಕ್ತ ಸ್ಥಳ’. ಈ ಸಂದರ್ಭದಲ್ಲಿ, ಇಡೀ ದೇಶದಲ್ಲಿ, ನಮ್ಮ ಮನಸ್ಸಿನಲ್ಲಿ ಅಯೋಧ್ಯೆಯ ಪುನರ್ನಿರ್ಮಾಣವು ಇಂದಿನ ಅಗತ್ಯವಾಗಿದೆ ಮತ್ತು ನಮ್ಮೆಲ್ಲರ ಕರ್ತವ್ಯವಾಗಿದೆ ಎಂದು ತಿಳಿಸಿದ್ದಾರೆ.
