ಸಿದ್ದಾಪುರ: ರದ್ದಾಗಿರುವ ದಾಂಡೇಲಿ- ಸಿದ್ದಾಪುರ- ಬೆಂಗಳೂರು ರಾತ್ರಿ ಬಸ್ಸನ್ನು ಪುನಃ ಆರಂಭಿಸುವಂತೆ ಸ್ಥಳೀಯ ನಾಗರಿಕರು ವಿಧಾನಸಭಾಧ್ಯಕ್ಷ ವಿಶ್ವೇಶ್ವರ ಹೆಗಡೆ ಕಾಗೇರಿಯವರಿಗೆ ಮನವಿ ಮಾಡಿ ಆಗ್ರಹಿಸಿದ್ದಾರೆ.
ಅನೇಕ ವರ್ಷಗಳಿಂದ ಇದ್ದ ದಾಂಡೇಲಿ- ಸಿದ್ದಾಪುರ- ಬೆಂಗಳೂರು ಬಸ್ಸು ರದ್ದುಗೊಂಡಿದೆ. ಸಿದ್ದಾಪುರ- ಸಾಗರದ ಪ್ರಯಾಣಿಕರಿಗೆ ಶಿರಸಿಯಿಂದ ರಾತ್ರಿ 9.30ಕ್ಕೆ ಬಿಡುವ ಕೊನೆಯ ಬಸ್ಸು ಇದಾಗಿತ್ತು. ಮುಂಜಾನೆ 3.45ಕ್ಕೆ ಸಾಗರದಿಂದ ಮತ್ತು 4.30ಕ್ಕೆ ಸಿದ್ದಾಪುರದಿಂದ ಶಿರಸಿಗೆ ಹೋಗುವ ಪ್ರಥಮ ಬಸ್ ಇದಾಗಿದ್ದು, ಈ ಬಸ್ ರದ್ದಾಗಿರುವುದರಿಂದ ಪ್ರಯಾಣಿಕರಿಗೆ ತುಂಬಾ ಅನಾನುಕೂಲವಾಗುತ್ತಿದೆ ಎಂದು ಗಮನಕ್ಕೆ ತಂದಿದ್ದಾರೆ.
ಮನವಿ ಸಲ್ಲಿಸುವ ಸಂದರ್ಭದಲ್ಲಿ ಅಮರನಾಥ ವಿ.ಭಟ್ಟಿ, ಪ್ರಶಾಂತ ಎಚ್.ಶೇಟ್, ಸಮೀರ್ ಮುನಾವರ ಸಾಬ್ ಮೊದಲಾದವರಿದ್ದರು.
