ನವದೆಹಲಿ: ಕಾಂಗ್ರೆಸ್ ನಾಯಕ ಕೆ.ಸಿ. ವೇಣುಗೋಪಾಲ್ ವಾಯುಯಾನ ಕ್ಷೇತ್ರದ ಬಗ್ಗೆ ಅಪ್ರಬುದ್ಧ ಟೀಕೆಗಳನ್ನು ಮಾಡಿದ್ದಾರೆ ಎಂದು ಕೇಂದ್ರ ನಾಗರಿಕ ವಿಮಾನಯಾನ ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ ಅವರು ಆರೋಪಿಸಿದ್ದಾರೆ. ಅಲ್ಲದೇ ಈ ಹಿಂದೆ ಗಣ್ಯರಿಗೆ ಮಾತ್ರ ಸೀಮಿತ ಆಗಿದ್ದ ಕ್ಷೇತ್ರವು ಪ್ರಧಾನಿ ನರೇಂದ್ರ ಮೋದಿ ಅವರ ನಾಯಕತ್ವದಲ್ಲಿ ನಿಜವಾಗಿಯೂ ಪ್ರಜಾಪ್ರಭುತ್ವಗೊಂಡಿದೆ ಎಂದು ಹೇಳಿದ್ದಾರೆ.
ನಾಗರಿಕ ವಿಮಾನಯಾನ ಖಾತೆಯ ರಾಜ್ಯ ಸಚಿವರಾಗಿಯೂ ಈ ಹಿಂದೆ ಸೇವೆ ಸಲ್ಲಿಸಿದ ವೇಣುಗೋಪಾಲ್ ವಿರುದ್ಧ ಟ್ವೀಟ್ ಮಾಡಿರುವ ಸಿಂಧಿಯಾ, “ಮಾಜಿ ನಾಗರಿಕ ವಿಮಾನಯಾನ ರಾಜ್ಯ ಸಚಿವರಾಗಿದ್ದ ಕೆ.ಸಿ. ವೇಣುಗೋಪಾಲ್ ಅವರು ವಾಯುಯಾನ ಕ್ಷೇತ್ರದ ಬಗ್ಗೆ ಇಂತಹ ವಿವೇಚನಾರಹಿತ ಮತ್ತು ಅಪ್ರಬುದ್ಧತೆಯ ಟೀಕೆಗಳನ್ನು ಮಾಡಿರುವುದು ಅತ್ಯಂತ ಆಘಾತಕಾರಿಯಾಗಿದೆ” ಎಂದಿದ್ದಾರೆ.
ದೆಹಲಿ-ಮುಂಬೈ ನಡುವಿನ ವಿಮಾನ ಟಿಕೆಟ್‌ಗಳ ದುಬಾರಿ ಬೆಲೆಯ ಬಗ್ಗೆ ಬಿಜೆಪಿ ನೇತೃತ್ವದ ಕೇಂದ್ರ ಸರ್ಕಾರದ ವಿರುದ್ಧ ವೇಣುಗೋಪಾಲ್ ವಾಗ್ದಾಳಿ ನಡೆಸಿದ ನಂತರ ಅವರ ಹೇಳಿಕೆಗಳು ಬಂದಿವೆ.
“ಭಾರತದ ಆರ್ಥಿಕತೆಯು ಆರೋಗ್ಯವಾಗಿದೆ. ಜಾಗತಿಕ ಆರ್ಥಿಕತೆಯು ಹೋರಾಟವನ್ನು ಮುಂದುವರೆಸುತ್ತಿದ್ದರೂ ಸಹ, ನಮ್ಮದು 6-6.5 ಶೇಕಡಾ ಬೆಳವಣಿಗೆಯ ದರದೊಂದಿಗೆ ಭರವಸೆಯ ದಾರಿದೀಪವಾಗಿ ನಿಂತಿದೆ. FY 2023-24 ರಲ್ಲಿ, ವಾಯುಯಾನದಂತಹ ಅನಿಯಂತ್ರಿತ ವಲಯವನ್ನು ಸರ್ಕಾರದ ನಿಯಂತ್ರಣದಲ್ಲಿ ಇಡಲು ಯಾವುದೇ ಕಾರಣವಿಲ್ಲ — ಇದರ ಪರಿಣಾಮಗಳು ಹಿಂದೆ ಈ ವಲಯದ ಬೆಳವಣಿಗೆಯ ಸಾಮರ್ಥ್ಯವನ್ನು ಕುಂಠಿತಗೊಳಿಸಿದವು” ಎನ್ನುವ ಮೂಲಕ ಸಿಂಧಿಯಾ ವೇಣುಗೋಪಾಲ್ ಅವರಿಗೆ ಟಾಂಗ್‌ ನೀಡಿದ್ದಾರೆ
“ಈ ಹಿಂದೆ GoFirst ನಿಂದ ಸೇವೆ ಸಲ್ಲಿಸುತ್ತಿದ್ದ ಮಾರ್ಗಗಳ ಒಂದು ಭಾಗವನ್ನು ಈಗಾಗಲೇ ಇತರ ವಿಮಾನಯಾನ ಸಂಸ್ಥೆಗಳಿಗೆ ಹಂಚಲಾಗಿದೆ. ಅಲ್ಲದೆ, 2014 ರಿಂದ ಈ ವಲಯವು ಕಂಡಿರುವ ಅಗಾಧ ಬೆಳವಣಿಗೆಗಳ ಬಗ್ಗೆ ನೀವು ಕಣ್ಣು ಮುಚ್ಚಿರುವಿರಿ. . 2014 ರಲ್ಲಿ ಪ್ರಯಾಣಿಕರ ಸಂಖ್ಯೆ 122 ಮಿಲಿಯನ್ ಇತ್ತು ಪ್ರಸ್ತುತ 280 ಮಿಲಿಯನ್ — ಶೇಕಡಾ 130 ರಷ್ಟು ಜಿಗಿತವಾಗಿದೆ. UDAN ಅಡಿಯಲ್ಲಿ, ನಾವು 475 ಮಾರ್ಗಗಳನ್ನು ಕಾರ್ಯಗತಗೊಳಿಸಿದ್ದೇವೆ ಮತ್ತು 116.06 ಲಕ್ಷ ಪ್ರಯಾಣಿಕರನ್ನು ಹಾರಿಸಿದ್ದೇವೆ” ಎಂದು ಸಿಂಧಿಯಾ ಹೇಳಿದ್ದಾರೆ.
