ಶಿರಸಿ: ಇಲ್ಲಿನ ಶ್ರೀ ಮಾರಿಕಾಂಬಾ ಸರಕಾರಿ ಪ್ರೌಢಶಾಲೆಯ ಆವರಣದಲ್ಲಿ ಹಳೆ ವಿದ್ಯಾರ್ಥಿಗಳ ಸಂಘದ ವತಿಯಿಂದ ಜ.26ರಂದು ಸ್ನೇಹ ಸಮ್ಮಿಲನ ಕಾರ್ಯಕ್ರಮ ಏರ್ಪಡಿಸಲಾಗಿತ್ತು.
ಕಾರ್ಯಕ್ರಮವನ್ನು ಶಾಸಕರ ಅನುಪಸ್ಥಿತಿಯಲ್ಲಿ ಶಿರಸಿ ನಗರ ಯೋಜನಾ ಪ್ರಾಧಿಕಾರದ ಅಧ್ಯಕ್ಷರಾದ ಜಗದೀಶ ಎನ್. ಗೌಡ ಉದ್ಘಾಟಿಸಿ ಮಾತನಾಡುತ್ತ ತಾವು ಕೂಡ ಈ ಸಂಸ್ಥೆಯ ಹಳೆಯ ವಿದ್ಯಾರ್ಥಿಯಾಗಿದ್ದು ನನ್ನ ಸಹಪಾಠಿಗಳು ಕೂಡ ತಮ್ಮ ಸಾಧನೆಗಳ ಮೂಲಕ ಈ ವೇದಿಕೆಯಲ್ಲಿ ಉಪಸ್ಥಿತರಿರುವುದು ಹೆಮ್ಮೆಯ ವಿಚಾರ. ಸಂಸ್ಥೆಯ ಅಭಿವೃದ್ಧಿಗೆ ಸಂಘದ ಮೂಲಕ ಹಮ್ಮಿಕೊಳ್ಳಲಾಗುವ ಕಾರ್ಯಕ್ರಮಗಳಿಗೆ ನಾವೂ ಕೈ ಜೋಡಿಸುತ್ತೇವೆ.ಶಾಸಕರ ಮೂಲಕ ಸರಕಾರದ ಮಟ್ಟದಲ್ಲಿ ಪ್ರಯತ್ನ ನಡೆಸುತ್ತೇವೆ.ಎಲ್ಲರೂ ಸೇರಿ ನೂರೈವತ್ತು ವರ್ಷಗಳ ಇತಿಹಾಸ ಹೊಂದಿರುವ ಈ ಪ್ರೌಢಶಾಲೆಯನ್ನು ಉನ್ನತಮಟ್ಟಕ್ಕೇರಿಸುವ ನಿಟ್ಟಿನಲ್ಲಿ ಪ್ರಯತ್ನಿಸೋಣ ಎಂದು ಹೇಳಿ ಕಾರ್ಯಕ್ರಮಕ್ಕೆ ಶುಭಹಾರೈಸಿದರು.
ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಗಳಾಗಿ ಆಗಮಿಸಿದ ಶಾಲೆಯ ಹಳೆಯ ವಿದ್ಯಾರ್ಥಿ KVAFSU-CVA Rabis Diagnostic Lab ಪ್ರೊಫೆಸರ್ ಶ್ರೀಕೃಷ್ಣ ಇಸಳೂರು ಇವರನ್ನು ಸಂಘದ ಪರವಾಗಿ ಗೌರವಿಸಲಾಯಿತು.
ನಂತರ ಮಾತನಾಡಿದ ಪ್ರತಿಭಾವಂತ ಹಳೆಯ ವಿದ್ಯಾರ್ಥಿ ಮತ್ತು ಹೆಸರಾಂತ ವಿಜ್ಞಾನಿ ಶ್ರೀಕೃಷ್ಣ ಇಸಳೂರು ತಾವು ಕಲಿತ ಶಾಲೆಯ ಕಾರ್ಯಕ್ರಮದಲ್ಲಿ ಗೌರವಿಸಿರುವುದು ಸಂತಸ ತರುವ ಸಂಗತಿ. ತಮ್ಮ ತಂದೆಯವರು ಈ ಸಂಸ್ಥೆಯಲ್ಲಿ ಕಾರ್ಯನಿರ್ವಹಿಸಿದ ಕುರಿತು ತಿಳಿಸಿ,ತಾವು ವಿದ್ಯಾರ್ಥಿಯಾಗಿದ್ದಾಗಿನ ಸಮಯದಲ್ಲಿ ಪಾಠ ಹೇಳಿದ ಹಿರಿಯ ಶಿಕ್ಷಕರನ್ನು ನೆನಪಿಸಿಕೊಂಡು ಪಾಠ ಪ್ರವಚನಗಳನ್ನು ಹೇಗೆ ಹೇಳಿಕೊಡುತ್ತಿದ್ದರು. ಅವರುಗಳ ನಡೆ ನುಡಿ ಬಗ್ಗೆ ಕೊಂಡಾಡಿದರು. ತಮ್ಮ ಸಹಪಾಠಿಗಳನ್ನು ನೆನಪಿಸಿಕೊಂಡರು. ತಮ್ಮ ಉನ್ನತ ವಿದ್ಯಾಭ್ಯಾಸಕ್ಕೆ ಇಲ್ಲಿಯ ಶಿಕ್ಷಕರ ಮಾರ್ಗದರ್ಶನ ಹೇಗೆ ನೆರವಾಯಿತು ಎಂದು ತಿಳಿಸುತ್ತ ಈಗಿನ ವಿದ್ಯಾರ್ಥಿಗಳು ಪಾಲಿಸಬೇಕಾದ ಮಾರ್ಗದರ್ಶಿ ಸೂತ್ರಗಳನ್ನು ಹೇಳುತ್ತ ಪ್ರೌಢಶಾಲೆಯ ಕುಂದು ಕೊರತೆಗಳಿಗೆ ಪರಿಹಾರ ಒದಗಿಸುವ ಬಗ್ಗೆ ಸಹಕಾರ ನೀಡುವುದಾಗಿ ಹೇಳಿದರು.
ಡಿಡಿಪಿಐ ಬಿ. ಬಸವರಾಜ ಪ್ರೌಢಶಾಲೆಯ ಸಾಧನೆಯ ಬಗ್ಗೆ ಹೇಳುತ್ತ ಜಿಲ್ಲೆಯಲ್ಲಿ ಅತಿ ಹೆಚ್ವು ಪ್ರವೇಶಾತಿ ದಾಖಲಾಗುವ ಈ ಶಾಲೆಯು ಮೂಲಭೂತ ಸೌಕರ್ಯಗಳ ಕೊರತೆಯನ್ನು ಎದುರಿಸುತ್ತಿದ್ದು ಹಳೆಯ ವಿದ್ಯಾರ್ಥಿಗಳು ಸಹಾಯ ಮಾಡಬೇಕೆಂದು ಕೋರುತ್ತ ಸರಕಾರದ ಪ್ರೋತ್ಸಾಹಕ ಕಾರ್ಯಕ್ರಮಗಳ ಕುರಿತು ತಿಳಿಸಿದರು. ಮತ್ತೋರ್ವ ಅತಿಥಿ ಹಿಂದಿನ ಉಪಪ್ರಾಂಶುಪಾಲ, ಬಿಇಓ ನಾಗರಾಜ ಸಿ.ನಾಯ್ಕ ಹಳೆಯ ವಿದ್ಯಾರ್ಥಿಗಳ ಸಂಘದ ಸ್ಥಾಪನೆಗಾಗಿ ಪ್ರಯತ್ನ ಮಾಡುವ ಸಂದರ್ಭದಲ್ಲಿ ವೆಬ್ ಸೈಟ್ ನಲ್ಲಿ ವಿಚಾರ ಹಂಚಿಕೊಂಡು ಸಂಪರ್ಕ ಮಾಡುವಂತೆ ಕೇಳಿಕೊಂಡಾಗ ಜಗತ್ತಿನ ಹಲವು ದೇಶಗಳಲ್ಲಿ ವಾಸಿಸುತ್ತಿದ್ದ ಹಳೆಯ ವಿದ್ಯಾರ್ಥಿಗಳು ಸಂಪರ್ಕ ಮಾಡಿದ್ದರು. ಈ ಪ್ರೌಢಶಾಲೆಯಲ್ಲಿ ಓದಿದ ಹಲವರು ಬೇರೆ ಬೇರೆ ದೇಶಗಳಲ್ಲಿ,ರಾಜ್ಯಗಳಲ್ಲಿ ಕಾರ್ಯ ನಿರ್ವಹಿಸ್ತಾ ಇದ್ದಾರೆ. ಉನ್ನತ ಪರಂಪರೆ ಹೊಂದಿದ ಈ ಪ್ರೌಢಶಾಲೆ ಯ ಶಿಕ್ಷಣದ ಅಭಿವೃದ್ಧಿಗೆ ಸಹಕಾರ ಕೋರಿದರು.
ಅಧ್ಯಕ್ಷತೆ ವಹಿಸಿ ಮಾತನಾಡಿದ ಶಿರಸಿ ನಗರಸಭಾ ಅಧ್ಯಕ್ಷೆ ಶರ್ಮಿಳಾ ಮಾದನಗೇರಿ ವಿದ್ಯಾರ್ಥಿಗಳು ಶಿಕ್ಷಣದ ಬಗ್ಗೆ ಬಹಳ ಆಸಕ್ತಿ ಇರಬೇಕು.ಯಾವುದೇ ಪ್ರಲೋಭನೆಗೆ ಒಳಗಾಗದೇ ಶಿಕ್ಷಕರು ಕಲಿಸಿದ ಪಾಠಗಳನ್ನು ಏಕಾಗ್ರತೆ ಮತ್ತು ಮನಸ್ಸು ಕೊಟ್ಟು ಅಭ್ಯಾಸ ಮಾಡಬೇಕು.ಉತ್ತಮ ಅಂಕಗಳನ್ನು ಗಳಿಸಬೇಕು,ಪಾಲಕರು ಕೂಡ ತಮ್ಮ ಮಕ್ಕಳ ಬಗ್ಗೆ ನಿಗಾ ವಹಿಸಬೇಕು. ಸಂಪರ್ಕ ಮಾಧ್ಯಮಗಳಿಂದ ದೂರವಿದ್ದು ಸಾಧನೆ ಮಾಡಬೇಕೆಂದರು.
ಇಕ್ರಾ ಶಿಕ್ಷಣ ಸಂಸ್ಥೆಯ ಸಿಇಓ ಅಲ್ ಹುದಾ ತಾವು ಈ ಶಾಲೆಯ ಹಳೆಯ ವಿದ್ಯಾರ್ಥಿನಿಯಾಗಿದ್ದು ತಮ್ಮ ಸಾಧನೆಗೆ ಶಿಕ್ಷಕರ ಕಲಿಸುವಿಕೆ ಮತ್ತು ಮಾರ್ಗದರ್ಶನ ಕಾರಣವೆಂದು ಹೇಳಿದರು. ಸಂಘದ ಅಧ್ಯಕ್ಷರಾದ ಶ್ರೀಪತಿ ನಾಯ್ಕ್ ಬೊಮ್ಮನಕೊಡ್ಲು ಪ್ರಾಸ್ತಾವಿಕವಾಗಿ ಮಾತನಾಡಿ ಸಂಘ ಬೆಳೆದುಬಂದ ಬಗೆಯನ್ನು ವಿವರಿಸಿ, ಧ್ಯೇಯೋದ್ದೇಶಗಳು, ಕಾರ್ಯಕ್ರಮಗಳು ಸಂಘದ ಬೆಳವಣಿಗೆ,ಶಾಲೆಯ ಅಭಿವೃದ್ಧಿಯಲ್ಲಿ ಸಂಘವು ವಹಿಸುತ್ತಿರುವ ಪಾತ್ರದ ತಿಳಿಸುತ್ತ ಹಳೆಯ ವಿದ್ಯಾರ್ಥಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಸಂಪರ್ಕ ಮಾಡಿ ಅಭಿವೃದ್ಧಿ ಗೆ ಕೈಜೋಡಿಸಲು ಕೋರುತ್ತ ಪ್ರೌಢಶಾಲೆಗೆ ಬೇಕಾಗುವ ಅಗತ್ಯತೆ ಗಳನ್ನು ಪೂರೈಸುವಲ್ಲಿ ತನು ಮನ ಧನ ಸಹಾಯ ನೀಡಲು ಮನವಿ ಮಾಡಿದರು.
ಕಾರ್ಯಕ್ರಮದಲ್ಲಿ ನಿವೃತ್ತ ಶಿಕ್ಷಕರು, ಸೈನಿಕರು, ರೈತರು, ಪೌರಕಾರ್ಮಿಕರನ್ನು ಗೌರವಿಸಲಾಯಿತು. ಪ್ರೌಢಶಾಲೆಯ ವಿದ್ಯಾರ್ಥಿಗಳಾದ ಯಕ್ಷ ಸಾಧಕಿ ತುಳಸಿ ರಾಘವೇಂದ್ರ ಹೆಗಡೆ ಬೆಟ್ಟಕೊಪ್ಪ ಮತ್ತು ಬ್ಯಾಡ್ಮಿಂಟನ್ ನಲ್ಲಿ ರಾಷ್ಟ್ರ ಮಟ್ಟಕ್ಕೆ ಆಯ್ಕೆಯಾದ ಹೇಮಂತ ಹೆಗಡೆ ಇವರನ್ನು ವೇದಿಕೆಯಲ್ಲಿದ್ದ ಗಣ್ಯರು ಸಂಘದ ಪರವಾಗಿ ಸನ್ಮಾನಿಸಿದರು. ಮನರಂಜನಾ ಕಾರ್ಯಕ್ರಮದ ಅಂಗವಾಗಿ ಜ್ಯೂ ಪುನೀತರಾಜ್ ಕುಮಾರ್ ಸಭಿಕರಲ್ಲಿ ವಿದ್ಯುತ್ ಸಂಚಲನ ಮೂಡಿಸಿದರು.ಅಗಲಿದ ಪ್ರಖ್ಯಾತ ನಟ ಪುನೀತ್ ರವರ ಅನುಕರಣೆ ಮಾಡಿ ಹಲವರ ಕಣ್ಣಂಚು ಒದ್ದೆಯಾಗಿಸಿದರು. ಖ್ಯಾತ ಯುವಗಾಯಕರು,ಹೆಸರಾಂತ ನೃತ್ಯ ತಂಡಗಳು ಪಾಲ್ಗೊಂಡು ಸೇರಿದ ಆಹ್ವಾನಿತ ಜನಸಮೂಹವನ್ನು ರಂಜಿಸಿದರು. ಪ್ರೌಢಶಾಲೆಯ ಬಹಳಷ್ಟು ವಿದ್ಯಾರ್ಥಿಗಳು ತಂಡಗಳಾಗಿ ನೃತ್ಯ ಗಳನ್ನು ಪ್ರಸ್ತುತ ಪಡಿಸಿದರು.
ವೇದಿಯಲ್ಲಿ ನಗರಸಭೆ ಸ್ಥಾಯಿಸಮಿತಿ ಅಧ್ಯಕ್ಷ ಕುಮಾರ ಬೋರ್ಕರ್,ಉಪಪ್ರಾಂಶುಪಾಲ ರಾಜೇಶ ವಿ. ನಾಯ್ಕ್, ಶ್ರೀಧರ ಮೊಗೇರ,ರಾಮು ನಾಯ್ಕ್,ಘನಶ್ಯಾಮ ಪ್ರಭು, ಗಣೇಶ ಜೈವಂತ,ಸಂಘದ ಗೌರವಾಧ್ಯಕ್ಷ ಮುತ್ತು ಪೂಜಾರಿ ಇವರೊಂದಿಗೆ ಪ್ರಶಾಂತ ಗುಡಿಗಾರ,ಸಚಿನ್ ಕೋಡಕಣಿ, ನೀಲೇಶ ಲೋಖಂಡೆ,ಕಿರಣ್ ಶಿರ್ಸಿಕರ್,ಬಾಲು ಶೆಟ್ಟಿ, ರಾಘವೇಂದ್ರ ರೇವಣಕರ್,ಮನೋಜ ಬಾಲನ್, ರಾಘವೇಂದ್ರ ಜಿ.ಎಮ್.,ದೇವರಾಜ ಸೇರಿದಂತೆ ಹಲವು ಹಳೆಯ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.
