ಲಂಡನ್: ಭಾರತದ ಕೋವ್ಯಾಕ್ಸಿನ್ ಅನ್ನು ನವೆಂಬರ್ 22 ರಿಂದ ಅಂತರರಾಷ್ಟ್ರೀಯ ಪ್ರಯಾಣಿಕರಿಗೆ ಅನುಮೋದಿತ ಕೋವಿಡ್-19 ಲಸಿಕೆಗಳ ಪಟ್ಟಿಗೆ ಸೇರಿಸಲಾಗುವುದು ಎಂದು ಯುಕೆ ಸರ್ಕಾರ ಹೇಳಿದೆ. ಅಂದರೆ ಭಾರತ್ ಬಯೋಟೆಕ್ ತಯಾರಿಸಿದ ಲಸಿಕೆ ಪಡೆದುಕೊಂಡವರು ಇನ್ನು ಮುಂದೆ ಇಂಗ್ಲೆಂಡ್‍ನಲ್ಲಿ ಐಸೋಲೆಟ್ ಆಗಬೇಕಾದ ಅವಶ್ಯಕತೆ ಇಲ್ಲ.
ವಿಶ್ವ ಆರೋಗ್ಯ ಸಂಸ್ಥೆಯು ಕೊವ್ಯಾಕ್ಸಿನ್ ಅನ್ನು ತುರ್ತು ಬಳಕೆಗೆ ಅನುಮೋದಿಸಿದ ಬಳಿಕ ಯುಕೆ ಈ ನಿರ್ಧಾರ ತೆಗೆದುಕೊಂಡಿದೆ, ಭಾರತದಲ್ಲಿ ಕೋವಿಶೀಲ್ಡ್ ನಂತರ ಕೊವ್ಯಾಕ್ಸಿನ್ ಎರಡನೇ ಅತೀ ಹೆಚ್ಚು ಬಳಸಲ್ಪಟ್ಟ ಲಸಿಕೆಯಾಗಿದೆ. ಭಾರತ ತಯಾರಿಸಿದ ಆಕ್ಸ್‍ಫರ್ಡ್-ಅಸ್ಟ್ರಾಜೆನೆಕಾ ಕೋವಿಡ್-19 ಲಸಿಕೆ ಕೋವಿಶೀಲ್ಡ್ ಅನ್ನು ಕಳೆದ ತಿಂಗಳು ಯುಕೆ ಅನುಮೋದಿತ ಪಟ್ಟಿಗೆ ಸೇರಿಸಿದೆ.
ಕೋವ್ಯಾಕ್ಸಿನ್ ಜೊತೆಗೆ, ವಿಶ್ವ ಆರೋಗ್ಯ ಸಂಸ್ಥೆಯ ಎಮರ್ಜೆನ್ಸಿ ಯೂಸ್ ಲಿಸ್ಟಿಂಗ್‍ನಲ್ಲಿರುವ ಚೀನಾದ ಸಿನೋವಾಕ್ ಮತ್ತು ಸಿನೋಫಾರ್ಮ್ ಅನ್ನು ಕೂಡ ಯುಕೆ ಸರ್ಕಾರವು ಅನುಮೋದಿತ ಲಸಿಕೆಗಳಾಗಿ ಗುರುತಿಸುತ್ತದೆ.
`ನಾವು ಸಾಂಕ್ರಾಮಿಕ ರೋಗದಿಂದ ಚೇತರಿಸಿಕೊಳ್ಳುತ್ತಿದ್ದೇವೆ ಮತ್ತು ಅಂತರಾಷ್ಟ್ರೀಯ ಲಸಿಕೆಗಳ ನಮ್ಮ ಗುರುತಿಸುವಿಕೆಯನ್ನು ವಿಸ್ತರಿಸುತೇವೆ, ಇಂದಿನ ಪ್ರಕಟಣೆಗಳು ನಮ್ಮ ಅಂತರಾಷ್ಟ್ರೀಯ ಪ್ರಯಾಣದ ಪುನರಾರಂಭದ ಮುಂದಿನ ಹಂತವನ್ನು ಗುರುತಿಸುತ್ತವೆ’ ಎಂದು ಯುಕೆ ಸಾರಿಗೆ ಕಾರ್ಯದರ್ಶಿ ಗ್ರಾಂಟ್ ಶಾಪ್ಸ್ ಹೇಳಿದ್ದಾರೆ.
ನ್ಯೂಸ್ 13
