• first
    second
    third
    previous arrow
    next arrow
  • ಬಿಸಗೋಡ-ನರಸೂರು ರಸ್ತೆಯಲ್ಲಿ ಕಪ್ಪು ಚಿರತೆ ಓಡಾಟ; ಗ್ರಾಮಸ್ಥರಿಗೆ ಆತಂಕ

    300x250 AD

    ಯಲ್ಲಾಪುರ: ತಾಲೂಕಿನ ಬಿಸಗೋಡ-ನರಸೂರು ರಸ್ತೆಯ ಸುತ್ತಮುತ್ತ ಕಾಡಿನಲ್ಲಿ ಕಪ್ಪು ಚಿರತೆಗಳು ಓಡಾಡುತ್ತಿದ್ದು, ಸ್ಥಳೀಯರಲ್ಲಿ ಆತಂಕ ಮೂಡಿಸಿದೆ.


    ಕಳೆದ ಕೆಲ ದಿವಸಗಳಿಂದ ಆ ಭಾಗದಲ್ಲಿ ರಾತ್ರಿ ವೇಳೆ ಚಿರತೆ ಓಡಾಟ ನಡೆಸುತ್ತಿದ್ದು, ರಾತ್ರಿ ವೇಳೆ ಘರ್ಜನೆ ಕೇಳುತ್ತಿತ್ತು. ಎರಡು ದಿವಸಗಳಿಂದ ಹಗಲು ಹೊತ್ತಿನಲ್ಲೂ ಓಡಾಡುತ್ತಿದ್ದು, ರಸ್ತೆಯಲ್ಲಿ ಕಾಣಿಸಿಕೊಳ್ಳತೊಡಗಿದೆ. ಬಿಸಗೋಡದಿಂದ ನರಸೂರಿಗೆ ಹೋಗುವ ಮಾರ್ಗದಲ್ಲಿ ಕಪ್ಪು ಚಿರತೆ ಓಡಾಡುತ್ತಿರುವುದನ್ನು ಗ್ರಾಮಸ್ಥರು ನೋಡಿದ್ದು ತೀರಾ ಭಯಗೊಳ್ಳುವಂತೆ ಮಾಡಿದೆ.


    ಬಿಸಗೋಡ, ನರಸೂರು ಸುತ್ತಮುತ್ತ ಕಾಡಿನಲ್ಲಿ ಹುಲಿಗಳ ಓಡಾಟವೇನೂ ಹೊಸದಲ್ಲ. ಆದರೆ ಆ ಭಾಗದಲ್ಲಿ ಚಿರತೆಗಳಿರುವುದು ಅಪರೂಪ. ಅದರಲ್ಲೂ ಕಪ್ಪುಚಿರತೆಯ ಓಡಾಟ ಗ್ರಾಮಸ್ಥರನ್ನು ಭಯಭೀತರನ್ನಾಗಿಸಿದೆ. ಗ್ರಾಮಸ್ಥರು ರಾತ್ರಿ ಮಾತ್ರವಲ್ಲ, ಆ ರಸ್ತೆಯಲ್ಲಿ ಹಗಲಿನಲ್ಲಿ ಓಡಾಡುವುದಕ್ಕೂ ಹೆದರುವಂತಾಗಿದೆ. ಸುತ್ತಮುತ್ತ ಹೈನುಗಾರಿಕೆ ಮಾಡುವವರು ಹೆಚ್ಚಾಗಿದ್ದು, ತಾವು ಸಾಕಿದ ದನ-ಕರುಗಳನ್ನು ಹಗಲಿನಲ್ಲಿ ಮೇಯುವುದಕ್ಕಾಗಿ ಕಾಡಿಗೆ ಬಿಡುತ್ತಾರೆ. ಆದರೆ ಇತ್ತೀಚಿನ ದಿನಗಳಲ್ಲಿ ಎಲ್ಲಿ ಚಿರತೆಯ ಬಾಯಿಗೆ ಆಹಾರವಾಗಿಬಿಡಬಹುದೆಂಬ ಆತಂಕದಿಂದಾಗಿ ದನಗಳನ್ನು ಕಾಡಿಗೆ ಬಿಡಲೂ ಭಯಪಡುವಂತಾಗಿದೆ. ಈಗಾಗಲೇ ಮೇಯಲು ಹೋದ ಒಂದೆರಡು ದನಗಳು ಚಿರತೆಯ ಬಾಯಿಗೆ ಬಲಿಯಾಗಿವೆ ಎನ್ನಲಾಗಿದೆ. ಒಂದೇ ಚಿರತೆ ಅಲ್ಲ, 3-4 ಚಿರತೆಗಳು ಓಡಾಡುತ್ತಿವೆ ಎಂದು ಹೇಳಲಾಗುತ್ತಿದೆ.

    300x250 AD


    ನರಸೂರು, ಕಣ್ಣಿಗೇರಿ, ಕೊಡಸೆ ಭಾಗಗಳಲ್ಲಿ ಸೆಪ್ಟೆಂಬರ್, ಅಕ್ಟೋಬರ್ ತಿಂಗಳು ಬಂತೆಂದರೆ ಕಾಡಾನೆಗಳು ಓಡಾಡುವುದು ಸಾಮಾನ್ಯ. ಈಗ ಅದೇ ವೇಳೆ ಕಪ್ಪು ಚಿರತೆ ಲಗ್ಗೆ ಇಟ್ಟಿದ್ದು, ಭಯದಲ್ಲೇ ದಿನ ಕಳೆಯುವ ಸ್ಥಿತಿ ಉಂಟಾಗಿದೆ. ಚಿರತೆಯಿಂದ ಅಪಾಯ ಉಂಟಾಗುವ ಮುನ್ನ ಅರಣ್ಯ ಇಲಾಖೆಯವರು ಚಿರತೆಯ ಭಯವನ್ನು ಹೋಗಲಾಡಿಸಲು ಕ್ರಮ ಕೈಗೊಳ್ಳಬೇಕಾಗಿದೆ.

    ಕಪ್ಪು ಚಿರತೆ ಕೆಲ ದಿವಸಗಳಿಂದ ನಮ್ಮ ಭಾಗದಲ್ಲಿ ಓಡಾಡುತ್ತಿದೆ. ಎರಡು ದಿವಸಗಳ ಹಿಂದೆ ರಸ್ತೆಯಲ್ಲಿ ನನಗೆ ಕಾಣಿಸಿಕೊಂಡಿತ್ತು. ಹೊರಗಡೆ ಓಡಾಡಲು ಭಯಪಡುವಂತಾಗಿದೆ. – ಸತೀಶ ಮರಾಠಿ, ಗ್ರಾಮಸ್ಥ

    ಬಿಸಗೋಡ ಭಾಗದಲ್ಲಿ 3-4 ಚಿರತೆಗಳು ಓಡಾಡುತ್ತಿರುವುದು ಗಮನಕ್ಕೆ ಬಂದಿದೆ. ಜನರಿಗೆ ಅಲ್ಲಲ್ಲಿ ಕಾಣಿಸಿಕೊಳ್ಳುತ್ತಲೂ ಇವೆ. ಅದರಿಂದ ಅಪಾಯ ಉಂಟಾಗುವ ಸಾಧ್ಯತೆ ಕಂಡುಬಂದರೆ ಬೇರೆಡೆ ಸಾಗಿಸಲು ಕ್ರಮ ಕೈಗೊಳ್ಳಲಾಗುವುದು. – ಸುನೀಲ, ಡಿ.ಆರ್.ಎಫ್.ಒ

    Share This
    300x250 AD
    300x250 AD
    300x250 AD
    Back to top