ಕೊರ್ಲಕಟ್ಟಾ ಸಂಘದ ರೈತರಿಗೆ ಅಡಿಕೆ ಬೆಳೆ ವಿಮೆ ಪರಿಹಾರ ಬಂದಿಲ್ಲ: ಶಿರಸಿ ಉಪವಿಭಾಗಾಧಿಕಾರಿಗೆ ಮನವಿ


ಶಿರಸಿ: ತಾಲೂಕಿನ ಕೋರ್ಲಕಟ್ಟಾ ವ್ಯವಸಾಯ ಸೇವಾ ಸಹಕಾರಿ ಸಂಘದ ವ್ಯಾಪ್ತಿಯ 350ಕ್ಕೂ ಅಧಿಕ‌ ರೈತರಿಗೆ ಅಡಿಕೆ ಬೆಳೆ ವಿಮೆ ಪರಿಹಾರ ಬಂದಿಲ್ಲ. ಕೂಡಲೇ ಪರಿಹಾರ ದೊರಕಿಸಿಕೊಡುವಂತೆ ಆಗ್ರಹಿಸಿ ಸೊಸೈಟಿ ಆಡಳಿತ ಮಂಡಳಿ ಸದಸ್ಯರು ಬುಧವಾರ ಮಧ್ಯಾಹ್ನ ಶಿರಸಿ ಉಪವಿಭಾಗಾಧಿಕಾರಿಗೆ ಮನವಿ ಸಲ್ಲಿಸಿದರು.

ಕೊರ್ಲಕಟ್ಟಾ ಸೊಸೈಟಿ ವ್ಯಾಪ್ತಿಯ ಕೆಲವು ಸದಸ್ಯರಿಗೆ ಮಾತ್ರ ಬಂದಿದೆ. ಇನ್ನೂ 350 ಸದಸ್ಯರಿಗೆ ಬಂದಿಲ್ಲ. ಸಂಘದ ವ್ಯಾಪ್ತಿಯ ಅಂಡಗಿ, ಬದನಗೋಡ, ಹಲಗದ್ದೆ, ಬಂಕನಾಳ, ಸುಗಾವಿ ಗ್ರಾಮ ಪಂಚಾಯ್ತಿ ವ್ಯಾಪ್ತಿಯ ರೈತರು ಪ್ರಿಮಿಯಂ ರಕಂ ತುಂಬಿದ್ದರೂ ಖಾತೆಗೆ ಜಮಾ ಆಗಿಲ್ಲ. ಈ ಕುರಿತು ಜಿಲ್ಲಾ ಮಧ್ಯವರ್ತಿ ಕೆಡಿಸಿಸಿ ಬ್ಯಾಂಕಿನಲ್ಲಿ ಕೇಳಿದರೆ ಕಂದಾಯ ಇಲಾಖೆಯಿಂದ ಮಾಡಿದ ಬೆಳೆ ಸಮೀಕ್ಷೆಯ ಬೆಳೆ ವಿವರಕ್ಕೂ ಹಾಗೂ ಸಂಘದಲ್ಲಿ ಸಾಲ ಪಡೆದ ಕ್ಷೇತ್ರದ ಬೆಳೆಯ ವಿವರಕ್ಕೂ ಹೊಂದಾಣಿಕೆ ಇಲ್ಲ ಎಂದು ತಿಳಿಸಿದ್ದಾರೆ.

ಸಂಘದಲ್ಲಿ ಕಂದಾಯ ಇಲಾಖೆಯವರು ನೀಡಿದ ಪಹಣಿ ಪತ್ರಿಕೆ ಪ್ರಕಾರ ಬೆಳೆಸಾಲ ನೀಡಲಾಗಿದೆ. ಆದರೂ ರೈತರ ಖಾತೆಗೆ ಬೆಳೆವಿಮೆ ಪರಿಹಾರ ಜಮಾ ಆಗಿಲ್ಲ. ಈ ಹಿನ್ನೆಲೆಯಲ್ಲಿ ರೈತ ಸದಸ್ಯರು ಗೊಂದಲಕ್ಕೀಡಾಗಿದ್ದು, ಅವರಿಗೆ ಉತ್ತರ ನೀಡಲು ಸಂಘದವರು ಅಸಹಾಯಕರಾಗಿದ್ದಾರೆ. ತಕ್ಷಣ ಸಂಬಂಧಪಟ್ಟ ಇಲಾಖೆ ಹಾಗೂ ವಿಮಾ ಕಂಪನಿಗೂ ಮಾಹಿತಿ ಕಳಿಸಿ ರೈತರಿಗೆ ವಿಮಾ ಪರಿಹಾರ ದೊರಕಿಸಿಕೊಡಬೇಕು. ವಿಳಂಬವಾದರೇ ಮುಂದಿನ ದಿನಗಳಲ್ಲಿ ಉಘ್ರ ಹೋರಾಟ ನಡೆಸಲಾಗುವುದು ಎಂದು ಎಚ್ಚರಿಸಿದರು.

ಈ ವೇಳೆ ಸಂಘದ ಅಧ್ಯಕ್ಷ ಪಿ.ಟಿ‌.ನಾಯ್ಕ ಕಂಡ್ರಾಜಿ, ಉಪಾಧ್ಯಕ್ಷೆ ಸುಜಾತಾ ನಾಯ್ಕ, ನಿರ್ದೇಶಕರಾದ ರವಿ ನಾಯ್ಕ ಕಲಕರಡಿ, ನೆಹರೂ ನಾಯ್ಕ, ಲೋಕೇಶ ನಾಯ್ಕ, ಮಂಜಪ್ಪ ನಾಯ್ಕ, ಸಹದೇವ ಕೊರಗರ, ಮುಖ್ಯ ಕಾರ್ಯನಿರ್ವಾಹಕ ಪ್ರಶಾಂತ ನಾಯ್ಕ ಉಪಸ್ಥಿತರಿದ್ದರು.

Categories: ಜಿಲ್ಲಾ ಸುದ್ದಿ

Leave A Reply

Your email address will not be published.