ಪನ್ನೀರ್ ಮಸಾಲಾ ಮ್ಯಾಗಿ ರುಚಿ ಸವಿದು ನೋಡಿ


ಅಡುಗೆ ಮನೆ: ಮ್ಯಾಗಿ ಎಂದರೆ ಯಾರಿಗೆ ತಾನೇ ಇಷ್ಟವಿರಲ್ಲ ಹೇಳಿ. ಸಮಯದ ಕೊರತೆಯಿಂದ ಹಲವರ ಬೆಳಿಗ್ಗಿನ ಉಪಹಾರ ಮ್ಯಾಗಿಯೇ ಆಗಿರುತ್ತೆ. ಅದನ್ನು ಹಲವು ವಿಧಾನಗಳಲ್ಲಿ ತಯಾರಿಸಬಹುದು. ಅದೇ ಪನ್ನೀರ್ ಜೊತೆ ಮ್ಯಾಗಿ ಸೇರಿಸಿ ತಿಂದರೆ ಇನ್ನಷ್ಟು ರುಚಿ ರುಚಿಯಾಗಿರುತ್ತದೆ. ಅದನ್ನು ಮಾಡುವ ವಿಧಾನ ತಿಳಿದುಕೊಳ್ಳೋಣ.

ಬೇಕಾಗುವ ಸಾಮಾಗ್ರಿಗಳು: ಪನ್ನೀರ್ – 200 ಗ್ರಾಂ, ಈರುಳ್ಳಿ – 1/2 ಕಪ್, ಶುಂಠಿ – 2 ಚಮಚ, ಬೆಳ್ಳುಳ್ಳಿ – 2 ಚಮಚ, ಟೊಮ್ಯಾಟೊ – 1/2 ಕಪ್, ಕ್ಯಾರೆಟ್ – 1/2 ಕಪ್, ಅಚ್ಚಖಾರದ ಪುಡಿ – 1/2 ಚಮಚ, ಅರಿಶಿಣ – 1/4 ಚಮಚ, ದನಿಯಾ ಪುಡಿ – 1/2 ಚಮಚ, ಹಸಿರು ಬಟಾಣಿ – 1/2 ಕಪ್, ಮ್ಯಾಗಿ – 1 ಪ್ಯಾಕೆಟ್

ಮಾಡುವ ವಿಧಾನ: ಒಂದು ಪ್ಯಾನ್‌ಗೆ ಒಂದು ಕಪ್ ನೀರನ್ನು ಹಾಕಿ ಕುದಿಸಿ. ಅದಕ್ಕೆ ಮ್ಯಾಗಿ ಪ್ಯಾಕೆಟ್ ಅನ್ನು ತೆರೆದು ಮ್ಯಾಗಿ ಮಸಾಲಾವನ್ನು ಕುದಿಯುತ್ತಿರುವ ನೀರಿಗೆ ಹಾಕಿ. ನಂತರ ಮ್ಯಾಗಿ ನೂಡಲ್ಸ್ ಅನ್ನು ಕಟ್ ಮಾಡಿ ನೀರಿಗೆ ಹಾಕಿ ಚೆನ್ನಾಗಿ ಬೇಯಿಸಿ, ನೀರು ಸುಮಾರಾಗಿ ಆರಿದ ನಂತರ ಒಂದೆಡೆ ಇಟ್ಟುಕೊಳ್ಳಿ. ನಂತರ ಒಂದು ಪ್ಯಾನ್‌ಗೆ 3-4 ಚಮಚ ಎಣ್ಣೆಯನ್ನು ಹಾಕಿ ಬಿಸಿಯಾದಾಗ ಪನ್ನೀರ್ ಕ್ಯೂಬ್‌ಗಳನ್ನು ಹಾಕಿ ಹೊಂಬಣ್ಣ ಬರುವವರೆಗೆ ಹುರಿದಿಟ್ಟುಕೊಳ್ಳಿ. ನಂತರ ಅದೇ ಪ್ಯಾನ್‌ನಲ್ಲಿ 1-2 ಚಮಚ ಎಣ್ಣೆಯನ್ನು ಹಾಕಿ ಬಿಸಿಯಾದ ನಂತರ ಹೆಚ್ಚಿದ ಈರುಳ್ಳಿ, ಶುಂಠಿ ಮತ್ತು ಬೆಳ್ಳುಳ್ಳಿಯನ್ನು ಹಾಕಿ 1 ನಿಮಿಷ ಹುರಿಯಿರಿ.

ನಂತರ ಅದಕ್ಕೆ ಹೆಚ್ಚಿದ ಟೊಮ್ಯಾಟೋವನ್ನು ಸೇರಿಸಿ 2 ನಿಮಿಷ ಹುರಿಯಿರಿ. ಬಳಿಕ ಅದಕ್ಕೆ ಅಚ್ಚಖಾರದ ಪುಡಿ, ಅರಿಶಿಣ, ದನಿಯಾ ಪುಡಿ, ಹೆಚ್ಚಿದ ಕ್ಯಾರೆಟ್, ಹಸಿರು ಬಟಾಣಿ ಮತ್ತು ರುಚಿಗೆ ತಕ್ಕಷ್ಟು ಉಪ್ಪನ್ನು ಸೇರಿಸಿ 3-4 ನಿಮಿಷ ಚೆನ್ನಾಗಿ ಹುರಿಯಿರಿ.ನಂತರ ಈ ಮಿಶ್ರಣಕ್ಕೆ ಈಗಾಗಲೇ ಹುರಿದಿಟ್ಟ ಪನ್ನೀರ್ ಅನ್ನು ಸೇರಿಸಿ ಸ್ವಲ್ಪ ನೀರು ಮತ್ತು ಮಾಡಿಟ್ಟು ಕೊಂಡಿರುವ ಮ್ಯಾಗಿಯನ್ನು ಸೇರಿಸಿ ಮಿಕ್ಸ್ ಮಾಡಿದರೆ ರುಚಿಯಾದ ಪನ್ನೀರ್ ಮಸಾಲಾ ಮ್ಯಾಗಿ ಟೇಸ್ಟ್ ಮಾಡಲು ಸಿದ್ಧ.

Categories: ಅಡುಗೆ ಮನೆ

Leave A Reply

Your email address will not be published.